یاغیش

دونن آخشام چاغی سنسیز منی آغلاتدی یاغیش
سپدی اؤز دامجیلارین گؤز یاشیما قاتدی یاغیش
اسدی یئل لاخلادی اندامی بو شهرین نه یامان
گوللرین ایدی بئلین تئللرین ایسلاتدی یاغیش
ائله بیل قلبی توتولموشدو گؤیون دوزمدی چوخ
بیر آغیریوک بو داوام سیز بئلیمه چاتدی یاغیش
دوشدوم آواره بو چؤلدن او چؤله گؤرمغیوه
فیکر ائلئیدیم گله جکسن منی آلداتدی یاغیش
بیر اوشاق تک منی آسلاندی نوازش ائله دی
آلدی اؤز کؤلگه سینه ال چالیب اویناتدی یاغیش
صوبحه جک شهری دولاندیم گؤزوم آختاردی سنی
منی جانسیز سئل آپارمیشلارا اوخشاتدی یاغیش
دوشدوم آواره بو چؤلدن او چؤله گؤرمغیوه
فیکر ائلئیدیم گله جکسن منی آلداتدی یاغیش 

چال

چوخداندی کؤنول سن کیمی بیر ساز چالان ایستیر

قوربانین اولوم چال، اوره گیم جان آلان ایستیر

بیر دونیا سوزوم قالدی سینه مده توزا باتدی

چال، کؤکلو سازیم جانه گلیب دیر، چالان ایستیر

بارماقلاروی چک سازیمین سیملرین اوینات

اینجیکلی دی، یورقوندو، بو سیملر، سایان ایستیر

گل باغریمی یارما دئمه کی سن ده گئدیرسن

بیر توستوله نن کؤنلومه باخ اوت سالان ایستیر

نه یازیم؟؟

نه یازیم من دارا بیریاشلی بوغازدان٬نه یازیم؟
ایاغ التیندا بیازگول لره نازدان نه یازیم؟
باخیرام قلبی سینیق آینالارا توی گئجه سی
آتاسیز قیزلارا حسرتلی جهازدان نه یازیم؟
نه ساغیمدان٬نه سولومدا بیر آچیق پنجره یوخ
داریخان کونلومه دیوارداکی سازدان نه یازیم؟
او اوشاغ لیقلاریمی چرچیلره ساتدی آنام
ایندیده یئرده ایپک فرشه٬پالازدان نه یازیم؟